ထိုင်းနိုင်ငံ၊ ရယောင်းပြည်နယ်တွင် ဗီဇာလိမ်လည်မှုနှင့်စပ်ဆက်နေသည့် မြန်မာလုပ်သား ၂၇ ဦးနှင့် တရုတ် ၇ ဦး ဖမ်းမိ

၂၇. ၇. ၂၀၂၅
Translated by Thettant

ထိုင်းနိုင်ငံ၊ ရယောင်းပြည်နယ်ရှိ ဆောက်လုပ်ရေးလုပ်ငန်းခွင်တစ်ခုကို ခရီးသွားရဲတပ်ဖွဲ့က ဝင်ရောက်စီးနင်းရာ နိုင်ငံခြားသား ဒါဇင်များစွာ တရားမဝင် အလုပ်လုပ်ကိုင်နေသည့် အကြီးစားဗီဇာလိမ်လည်မှုတစ်ခုကို ဖော်ထုတ်နိုင်ခဲ့သည်။

ခရီးသွားရဲတပ်ဖွဲ့ဌာနမှ ဦးဆောင်သော အဆိုပါ စစ်ဆင်ရေးတွင် နိခုံဖတ်ထန စက်မှုဇုန်ရှိ လုပ်ငန်းခွင်တစ်ခု၌ နိုင်ငံခြားသားလုပ်သား ၃၄ ဦး (တရုတ် ၇ ဦးနှင့် မြန်မာ ၂၇ ဦး) ကို ဖမ်းဆီးခဲ့သည်။ အဆိုပါလုပ်သားများသည် ခရီးသွားဗီဇာဖြင့် နိုင်ငံထဲသို့ ဝင်ရောက်လာခြင်းဖြစ်ပြီး တရားဝင်အလုပ်လုပ်ခွင့် ပါမစ်မရှိသည်ကို တွေ့ရှိရသည်။

ဤဖမ်းဆီးမှုသည် ထိုင်းအလုပ်သမားဈေးကွက်ကို ထိခိုက်စေပြီး နိုင်ငံဖြတ်ကျော်ရာဇဝတ်ဂိုဏ်းများနှင့် ဆက်စပ်နေသည်ဟု ယူဆရသော တရားမဝင်အလုပ်အကိုင် ကွန်ရက်များကို ဖြိုခွဲရန်အတွက် ပိုမိုကျယ်ပြန့်သော အမျိုးသားရေးကြိုးပမ်းမှု၏ တစ်စိတ်တစ်ပိုင်းဖြစ်သည်။

တော်ဝင်ထိုင်းရဲတပ်ဖွဲ့ (RTP) မှ ရဲချုပ်ကြီး ကစ်တီရတ် ဖန်ဖတ် (Kittirat Phanphet) က “ဒီစစ်ဆင်ရေးဟာ ထိုင်းနိုင်ငံရဲ့ စီးပွားရေးနဲ့ အချုပ်အခြာအာဏာကို ကာကွယ်ဖို့ ကျွန်တော်တို့ရဲ့ ကတိကဝတ်ကို ထင်ဟပ်စေပါတယ်” ဟု ပြောကြားခဲ့သည်။

ဇူလိုင်လ ၂၃ ရက်နေ့တွင် ရယောင်းပြည်နယ်တရားရုံးမှ ထုတ်ပေးခဲ့သော ရှာဖွေဝရမ်းအမှတ် ၁၁၈/၂၅၆၈ ဖြင့် အရာရှိများသည် စက်မှုဇုန်အတွင်းရှိ ခြံစည်းရိုးခတ်ထားသော နေရာသို့ ဝင်ရောက်၍ သံသယရှိသူများကို ဖမ်းဆီးခဲ့ကြောင်း The Pattaya News က ဖော်ပြခဲ့သည်။

ဖမ်းဆီးရမိသူများထဲတွင် တရုတ်လုပ်သားတစ်ဦးသည် တစ်လကြာ ပိုင်ဖောက်လုပ်ငန်းများကို ကြီးကြပ်နေခဲ့ပြီး ဘတ် ၂၇,၀၀၀ ရရှိခဲ့သည်။ နောက်ထပ်တစ်ဦးမှာ အဆောက်အအုံများကို စစ်ဆေးနေသည်ကို တွေ့ရှိရပြီး လစာ ယွမ် ၆,၀၀၀ မှ ၉,၀၀၀ (ထိုင်းဘတ် ၃၀,၀၀၀ မှ ၄၅,၀၀၀ ဝန်းကျင်) ရရှိခဲ့ကာ ကနဦးတွင် တရုတ်ဘဏ်အကောင့်များမှတစ်ဆင့် ပေးချေပြီး နောက်ပိုင်းတွင် ငွေသားဖြင့် ပေးချေခဲ့သည်။ တတိယတစ်ဦးမှာ ဤနှစ်အတွင်း ထိုင်းနိုင်ငံသို့ နှစ်ကြိမ်လာရောက်၍ စီမံကိန်းတိုးတက်မှုကို စောင့်ကြည့်ခဲ့ပြီး တရုတ်အလုပ်ရှင်ထံမှ လစဉ် ယွမ် ၆,၀၀၀ နှင့် အခြားအကျိုးခံစားခွင့်များ ရရှိခဲ့ကြောင်း ဝန်ခံခဲ့သည်။

“ဒီလူတွေဟာ အလုပ်သမားတွေသက်သက် မဟုတ်ပါဘူး၊ သူတို့ဟာ ထိုင်းဥပဒေကို ရှောင်ကွင်းဖို့ ပူးပေါင်းကြိုးပမ်းမှုရဲ့ တစ်စိတ်တစ်ပိုင်းပါပဲ” ဟု စစ်ဆင်ရေးတွင် ပါဝင်ခဲ့သည့် ရဲသတင်းရင်းမြစ်တစ်ဦးက ပြောကြားခဲ့သည်။

သံသယရှိသူအားလုံးကို ၎င်းတို့၏ တရားဝင်အခွင့်အရေးများ အကြောင်းကြားခဲ့ပြီး အလုပ်လုပ်ခွင့်ပါမစ်မရှိဘဲ လုပ်ကိုင်မှုဖြင့် တရားစွဲဆိုခဲ့သည်။ ၎င်းတို့အား နောက်ပိုင်းတွင် အရေးယူမှု ထပ်မံဆောင်ရွက်ရန်နှင့် နှင်ထုတ်နိုင်ခြေရှိသည့် ရယောင်းရှိ နောင်ခရက်ဘ် ရဲစခန်းသို့ လွှဲပြောင်းပေးခဲ့သည်။

ခရီးသွားရဲတပ်ဖွဲ့ကမူ စုံစမ်းစစ်ဆေးမှုများ ဆက်လက်လုပ်ဆောင်နေပြီး နိုင်ငံတစ်ဝှမ်းလုံးတွင် ဗီဇာအလွဲသုံးစားမှုများကို နှိမ်နင်းရာတွင် နောက်ထပ်ဖမ်းဆီးမှုများလည်း ရှိလာနိုင်သည်ဟု သတိပေးခဲ့သည်။

Ref, The Thaiger