အမေရိကန်ပြည်ထောင်စု၊ တက္ကဆက်ပြည်နယ်အတွင်း ရေလွှမ်းမိုးမှုများကြောင့် အနည်းဆုံး လူ ၁၃ ဦးသေဆုံးပြီး ကလေးငယ် ၂၀ ပျောက်ဆုံးနေ

၅.၇.၂၀၂၅
Translated by Htwe Ko Tun

အမေရိကန်ပြည်ထောင်စု၊ တက္ကဆက်ပြည်နယ်၊ ကား ခရိုင်(Kerr County)အတွင်းမှာ ရာသီဥတုအခြေ အနေဆိုးရွားမှုကြောင့် ကြီးမားစွာရေလွှမ်းမိုးမှု ဖြစ်နေရတာကြောင့် သေဆုံးသူ အနည်းဆုံး ၁၃ ဦးရှိသွားပြီလို့ သိရပါတယ်။

ရေလွှမ်းမိုးမှုအတွင်းမှာ ဒေသခံပြည်သူတွေလည်း ပျောက်ဆုံးလျက်ရှိတာမှာ ကလေးငယ် ၂၀ ဦးခန့်ပျောက်ဆုံးနေတယ်လို့ အာဏာပိုင်တွေက ဇူလိုင်လ ၄ ရက်မှာ ပြောခဲ့ကြပါတယ်။ ရေအမြင့်က ၄၅ မိနစ်အတွင်းမှာ ၂၆ ပေ အထိမြင့်တက်လာခဲ့တာမှာ ပစ္စည်းဥစ္စာတွေနဲ့ လူတွေပါသေကြေပျက်စီးခဲ့ရတဲ့ ဆိုးရွားလှတဲ့ရေလွှမ်းမိုးမှုဖြစ်တယ်လို့လည်း ပြောခဲ့ကြပါတယ်။

ခရစ်ယာန်ဘာသာဝင်တွေရဲ့ မိန်းကလေးတွေအတွက် ပြည်နယ်အတွင်း နွေရာသီစခန်းတစ်ခုဖြစ်တ့ဲ Hunt မြို့မှာရှိတဲ့ All-girls Camp Mystic မှာဆိုရင် တက်ရောက်နေတဲ့ ကလေးငယ် ၇၅၀ ခန့်ဟာ ဆိုးရွားလှတဲ့ရေလွှမ်းမိုးမှုခံရပြီး အနည်းဆုံး ၂၀ ဦးပျောက်ဆုံးနေတယ်လို့ အာဏာပိုင်တွေက ဇူလိုင်လ ၄ ရက်က ပြုလုပ်တဲ့သတင်းစာရှင်းပွဲမှာ ပြောခဲ့ကြပါတယ်။

ရှာဖွေရေးနဲ့ကယ်ဆယ်ရေးအတွက် ဒေသအာဏာပိုင်တွေမှာ ကိရိယာပစ္စည်းအလုံအလောက်မရှိလို့ ပုဂ္ဂလိက ရဟတ်ယာဉ်တွေနဲ့ မောင်းသူမဲ့လေယာဉ်တွေကိုလည်း အကူအညီတောင်းထားရတယ်လို့ သိရပါတယ်။ ဇူလိုင်လ ၄ ရက်မှာတော့ ရှာဖွေကယ်ဆယ်ရေးကို ရဟတ်ယာဉ် ၁၄ စီး၊ မောင်းသူမဲ့လေယာဉ် ၁၂ စီး၊ ကယ်ဆယ်ရေးအဖွဲ့ ကိုးဖွဲ့၊ ရေကူးသမားတွေနဲ့အတူ ဆောင်ရွက်နေပြီး ကုန်းပေါ်မှာ လည်း လူ ၄၀၀ မှ ၅၀၀ အထိ ဆောင်ရွက်နေကြတယ်လို့ သိရပါတယ်။

ရှာဖွေကယ်ဆယ်ရေးလုပ်ငန်းတွေကို ဒေသစံတော်ချိန် ဇူလိုင်လ ၄ ရက် တစ်ညလုံး ဆက်လက်လုပ်ဆောင်သွားမယ်လို့ တာဝန်ရှိသူတစ်ဦးက အတည်ပြုခဲ့ပါတယ်။ ဇူလိုင်လ ၄ ရက် အမေရိကန်နိုင်ငံရဲ့ လွတ်လပ်ရေးနေ့ကစလို့ အခုအပတ်ကုန်ရက်တွေမှာ ပြည်နယ်အတွင်းက နွေရာသီစခန်းတွေအတွင်း လာရောက်သူကလေးငယ်တွေ ထောင်နဲ့ချီရှိနေကြတဲ့အချိန်မှာ ခုလို ရေလွှမ်းမိုးမှုဖြစ်ပွားခဲ့ရတာလည်း ဖြစ်ပါတယ်။

Ref- BBC