၂၇.၇.၂၀၂၆
Written by KL
ရန်ကုန်တိုင်းဒေသကြီး၊ ရန်ကင်းမြို့နယ်၊ (၁၆) ရပ်ကွက်၊ ပြည်သာယာလမ်းရှိ Bangkok Bites စားသောက်ဆိုင်တွင် ဇူလိုင်လ ၂၆ ရက် ည ၈ နာရီ ၁၂ မိနစ်ခန့်က ဖြစ်ပွားခဲ့သော မီးလောင်မှုမှာ မြေညီထပ် ဝန်ထမ်းအိပ်ဆောင်ရှိ စားပွဲတင်ပန်ကာ အပူလွန်ကဲရာမှ အိပ်ယာပေါ်သို့ မီးပွားကျ၍ မီးလောင်ကျွမ်းခဲ့ကြောင်း စစ်ဆေးသူများ၏ အတည်ပြုချက်အရ သိရသည်။
မီးလောင်မှုကြောင့် အလျား ပေ ၄၀၊ အနံ ပေ ၅၀ ရှိ Steel Structure အုတ်ညှပ် နှစ်ထပ် စားသောက်ဆိုင်မြေညီထပ်ရှိ လျှာထိုးကြမ်းခင်း၊ အထပ်သားအိပ်စင်တစ်ခု၊ စားပွဲတင်ပန်ကာ နှစ်လုံး၊ ဆိုင်အတွင်းရှိ လျှပ်စစ်ဝါယာကြိုးနှင့် ဆက်စပ်ပစ္စည်းများ မီးလောင်ဆုံးရှုံးခဲ့သော်လည်း လူထိခိုက်မှုမရှိကြောင်း သိရသည်။
မိနစ် ၃၀ ခန့်ကြာမြင့်သော မီးလောင်မှုကို မီးငြှိမ်းသတ်ယာဥ် ၆ စီး၊ ရေသယ်ယာဥ် ၁၀ စီး၊ သန္ဓေအရန်မီးသတ်တပ်ဖွဲ့ဝင် ၁၀၀ ကျော်ဖြင့် ဝိုင်းဝန်းငြှိမ်းသတ်ခဲ့ရာ ည ၈ နာရီ ၄၃ မိနစ်တွင် မီးငြိမ်းခဲ့သည်။
စားသောက်ဆိုင်မီးလောင်မှုကြောင့် အသက် ၃၉ နှစ်အရွယ် ဆိုင်မန်နေဂျာ အမျိုးသားကို ရာဇသတ်ကြီးဥပဒေပုဒ်မ၂၈၅ ဖြင့် ရန်ကင်းမြို့မရဲစခန်းက အမှုဖွင့်အရေးယူထားကြောင်း သိရသည်။
About the Author
