၆. ၁၀. ၂၀၂၂
Written by Thi Ha
ရန်ကုန်မြို့ မြို့ပတ်ရထားခရီးစဉ်များကို ပုံမှန်အတိုင်းပြန်လည်ပြင်ဆင်ပြေးဆွဲပေးနေသော်လည်း နေ့စဉ် စီးနင်းလိုက်ပါသူ လူဉီးရေ ပျှမ်းမျှ ၂၀၀၀ ကျော်သာ ရှိပြီး လိုက်ပါစီးနင်းသူအလွန်နည်းပါးနေကြောင်း သိရသည်။
တစ်ချိန်က နေ့စဥ်စီးနင်းသူ လူဦးရေ ၁၈၀၀၀ ခန့်ရှိခဲ့ရာမှ COVID-19 ရောဂါနှင့် ၂၀၂၁ ဖေဖော်ဝါရီဖြစ်စဥ်များကြောင့် စီးနင်းသူနည်းပါးသွားခဲ့သည့်အတွက် လက်ရှိတွင် မြို့ပတ်ရထား ၃ စင်းနှင့် မနက် ၇ နာရီ ၄၅ မိနစ်မှ စတင်ပြေးဆွဲပေးနေပြီး ညနေ ၅ နာရီ၂၀ တွင် နောက်ဆုံးရထား ထွက်ခွာပေးသည်ဟု မြန်မာ့မီးရထားမှ သိရသည်။
ယခင်က ရုံးတက် ရုံးဆင်းချိန်များ၌ ရထားတွဲပြည့် ခရီးသည်လိုက်ပါစီးနင်းမှုရှိသော်လည်း ပြန်လည်ဖွင့်လှစ်သည့် စက်တင်ဘာ ၁၂ ရက်မှ ယနေ့ အောက်တိုဘာ ၆ ရက်အတွင်း အရှုံးခံပြေးဆွဲနေရသည့် အနေအထားဖြစ်နေသည်ဟု မြန်မာ့မီးရထားမှ တာဝန်ရှိသူတစ်ဦးက MT news ၏ မေးမြန်းမှုကို ပြန်လည်ဖြေကြားသည်။
မြို့ပတ်ရထား၏ လက်မှတ်ခနှုန်းထားများလည်း ပြင်ဆင်သတ်မှတ်ထားပြီး ယခင်ခရီးစဉ် အစအဆုံး ကျပ် ၂၀၀ မှ ယခုအခါ ၁၀ မိုင်ခရီးကို ၂၀၀ ကျပ်ဆီ ခွဲ၍ ကောက်ခံလျှက်ရှိကြောင်း သိရပြီး မြို့ပတ်ရထား ဖြတ်သန်းသည့် ခရီးစဉ်မှာ ၂၉.၅ မိုင်ရှိသဖြင့် ခရီးစဉ်တစ်လျှောက် လိုက်ပါစီးနင်းမည်ဆိုပါက ကျပ် ၃၀၀ ကျသင့်မည်ဟု သိရသည်။
About the Author
