သက်တံ့
၂၂. ၇. ၂၀၂၆
မြန်မာနိုင်ငံ၊ မူဆယ်မြို့နှင့် နယ်စပ်ဂိတ်တစ်ခုသာခြားပြီး နယ်မြေချင်းထိစပ်နေသည့် တရုတ်နိုင်ငံ၊ ယူနန်ပြည်နယ်၊ ရွှေလီမြို့တွင် အရေးပေါ်ခွဲစိတ်ကုသမှု ခံယူနေရသည့် အသက် ၈၀ အရွယ် တရုတ်လူနာတစ်ဦးအတွက် မြန်မာနိုင်ငံမှ စေတနာ့ဝန်ထမ်းများက မကြာသေးမီက သွေးလှူဒါန်းခဲ့ကြသည်။
နယ်စပ်မြို့ရှိ ဆေးရုံတစ်ရုံသို့ ချော်လဲဒဏ်ရာဖြင့် ရောက်ရှိလာသည့် အဆိုပါလူနာသည် ကျန်းမာရေးအခြေအနေ မကောင်းမွန်ဘဲ တတ်နိုင်သမျှ ရှုပ်ထွေးပြီး စွန့်စားရမှုများသည့် ခွဲစိတ်ကုသမှုတစ်ခု ပြုလုပ်ရန် လိုအပ်နေခဲ့သည်။ ခွဲစိတ်ကုသမှု မစတင်မီ လုံလောက်သော သွေးသိုလှောင်မှုရှိရန် လိုအပ်သည်ဟု ဆရာဝန်များက ပြောကြားခဲ့သည်။
ထိုသို့ အရေးပေါ်လိုအပ်ချက်ကို သိရှိပြီးနောက် ရွှေလီမြို့ရှိ စေတနာ့ဝန်ထမ်း ဝန်ဆောင်မှုဗဟိုဌာနက သွေးလှူဒါန်းရန် နှိုးဆော်ခဲ့ရာ မြန်မာစေတနာ့ဝန်ထမ်း အများအပြားက တုံ့ပြန်ခဲ့ကြပြီး ဒေသတွင်း သွေးလှူဘဏ်၌ သွေးသွားရောက်လှူဒါန်းခဲ့ကြသည်။
ရွှေလီမြို့တွင် လူမှုကူညီရေးလုပ်ငန်းများကို လာရောက်လုပ်ကိုင်နေသည်မှာ ကြာပြီဖြစ်သော မြန်မာစေတနာ့ဝန်ထမ်း မဝင်းမာဌေးက လူနာ၏အခြေအနေကို သိရှိပြီးနောက် ဝေခွဲမနေဘဲ သွေးလှူဒါန်းခဲ့ခြင်းဖြစ်ကြောင်း ပြောကြားခဲ့သည်။ “အသက်တစ်ချောင်းကို ကယ်တင်ဖို့အတွက် ကျွန်မရဲ့ သေးငယ်တဲ့ အစိတ်အပိုင်းလေးကနေ ပါဝင်ခွင့်ရတာ ဂုဏ်ယူပါတယ်” ဟု သူမက ဆိုသည်။
အလားတူ သွေးလှူဒါန်းသည့် အခြားစေတနာ့ဝန်ထမ်းတစ်ဦးဖြစ်သူ မသီတာခိုင်ကလည်း တရုတ်နှင့် မြန်မာပြည်သူများကြားမှ ချစ်ကြည်ရေးသည် နိုင်ငံနယ်နိမိတ်များကို ကျော်လွန်၍ တစ်ဦးနှင့်တစ်ဦး ရိုင်းပင်းကူညီကြသည့် နေ့စဉ်လူမှုဘဝ အပြုအမူများတွင် ထင်ဟပ်နေကြောင်း ပြောကြားခဲ့သည်။
၂၀၂၃ ခုနှစ်မှစ၍ အဆိုပါဗဟိုဌာနရှိ မြန်မာစေတနာ့ဝန်ထမ်းများသည် သွေးလှူဒါန်းမှုပေါင်း အကြိမ် ၆၀၀ နီးပါး ပြုလုပ်ခဲ့ပြီးဖြစ်ကြောင်း၊ နယ်စပ်ဖြတ်ကျော် အများပြည်သူအကျိုးပြု လုပ်ငန်းများနှင့် လိုအပ်နေသူများကို ကူညီပံ့ပိုးပေးရာတွင် များစွာအထောက်အကူဖြစ်စေကြောင်း ဒေသဆိုင်ရာ အာဏာပိုင်များ၏ ထုတ်ပြန်ချက်အရ သိရသည်။
Ref : China Daily
About the Author
