သက်တံ့
၉. ၆. ၂၀၂၆
အမေရိကန် ပင်တဂွန်စစ်ဌာနချုပ်သည် Alibaba၊ BYD၊ Baidu အပါအဝင် အခြားတရုတ်ကုမ္ပဏီအများအပြားကို တရုတ်စစ်တပ်နှင့် ဆက်နွှယ်နေသည့် အဖွဲ့အစည်းများစာရင်းထဲသို့ ထည့်သွင်းတော့မည်ဖြစ်ကြောင်း တနင်္လာနေ့တွင် ပြောကြားလိုက်ပြီး အမေရိကန်နှင့် တရုတ်နိုင်ငံတို့အကြား နည်းပညာဆိုင်ရာ အပြိုင်အဆိုင်ဖြစ်နေသော အဓိကကဏ္ဍများကို ပစ်မှတ်ထားသည့် အမည်ပျက်စာရင်းကို ပိုမိုကျယ်ပြန့်စေခဲ့သည်။
ဗုဒ္ဓဟူးနေ့တွင် တရားဝင်ထုတ်ပြန်ရန် လျာထားသည့် ဖက်ဒရယ်မှတ်တမ်း (Federal Register) အသိပေးချက်အရ အမေရိကန်ကာကွယ်ရေးဝန်ကြီးဌာနသည် နိုင်ငံတော်ကာကွယ်ရေးလုပ်ပိုင်ခွင့်အာဏာဥပဒေ (NDAA) ၏ ပုဒ်မ ၁၂၆၀ H အရ အဆိုပါ တရုတ်ကုမ္ပဏီအမြောက်အမြားကို “တရုတ်စစ်ဘက်ဆိုင်ရာကုမ္ပဏီများ” အဖြစ် သတ်မှတ်ကာ အမည်ပျက်စာရင်းသွင်းရန် အကြောင်းကြားခဲ့ခြင်းဖြစ်သည်။
အဆိုပါကုမ္ပဏီများထဲတွင် လျှပ်စစ်ကား (EV) ထုတ်လုပ်သူများ၊ ဉာဏ်ရည်တု (AI) ကုမ္ပဏီများ၊ ဘက်ထရီထုတ်လုပ်သူများ၊ ဇီဝနည်းပညာကုမ္ပဏီများနှင့် ဆိုလာစွမ်းအင်ထောက်ပံ့သည့် ကုမ္ပဏီများ ပါဝင်သည်။ ဤသို့ သတ်မှတ်လိုက်ခြင်းကြောင့် အဆိုပါကုမ္ပဏီများအနေဖြင့် အမေရိကန်၏ အရင်းအနှီးစျေးကွက်နှင့် အစိုးရလုပ်ငန်းများကို ရယူရာတွင် အခက်အခဲများ ရှိလာနိုင်သော်လည်း ဒဏ်ခတ်ပိတ်ဆို့မှု (Sanctions) များကို အလိုအလျောက်ဖြစ်ပေါ်စေခြင်းမျိုးတော့ မဟုတ်ပေ။
အသစ်ထည့်သွင်းလိုက်သည့် ကုမ္ပဏီများထဲတွင် ထင်ရှားသော ကုမ္ပဏီအချို့မှာ အွန်လိုင်းအရောင်းအဝယ် (e-commerce) နည်းပညာဘီလူးကြီးဖြစ်သည့် Alibaba၊ ရှာဖွေရေးအင်ဂျင်နှင့် AI ကုမ္ပဏီဖြစ်သည့် Baidu၊ လျှပ်စစ်ကားထုတ်လုပ်သည့် ကုမ္ပဏီများဖြစ်သော BYD နှင့် Nio၊ ဆေးဝါးသုတေသနနှင့် ထုတ်လုပ်ရေးကုမ္ပဏီဖြစ်သည့် WuXi AppTec၊ ရိုဘော့ထုတ်လုပ်သည့် Unitree၊ ကွန်ရက်ချိတ်ဆက်မှုဆိုင်ရာ စက်ပစ္စည်းထုတ်လုပ်သည့် TP-Link နှင့် ဆိုလာကုမ္ပဏီများဖြစ်သော JA Solar နှင့် Trina Solar တို့ ဖြစ်ကြသည်။ ထို့အပြင် ဘက်ထရီထုတ်လုပ်သည့် CALB နှင့် EVE Energy၊ လေဆာအာရုံခံနည်းပညာ (Lidar) ကုမ္ပဏီများဖြစ်သော Hesai နှင့် RoboSense နှင့် မျက်နှာပြင်ပြသမှုစနစ် (Display-panel) ထုတ်လုပ်သည့် BOE Technology Group တို့လည်း အဆိုပါစာရင်းတွင် ပါဝင်သည်။
Alibaba ကုမ္ပဏီသည် South China Morning Post သတင်းစာ၏ ပိုင်ရှင်လည်းဖြစ်သည်။ ၎င်းကုမ္ပဏီဘက်ကမူ ဤကိစ္စနှင့်ပတ်သက်၍ မှတ်ချက်ပေးရန် တောင်းဆိုမှုကို တစ်စုံတစ်ရာ တုံ့ပြန်ပြောကြားခြင်း မရှိသေးပေ။
ပင်တဂွန်စစ်ဌာနချုပ်၏ ပြောကြားချက်အရ အဆိုပါကုမ္ပဏီများသည် တရုတ်အစိုးရပိုင် အဖွဲ့အစည်းများ၊ စစ်ဘက်-လူထုဘက်စုံ ပေါင်းစပ်ညှိနှိုင်းမှု အစီအစဉ်များ၊ တရုတ်ပြည်သူ့လွတ်မြောက်ရေးတပ်မတော် (PLA) သို့မဟုတ် အစိုးရ၏ စက်မှုဆိုင်ရာ စီမံကိန်းများနှင့် ပတ်သက်ဆက်နွှယ်နေသည်ဟူသော အချက်များအပေါ် အခြေခံကာ ဥပဒေကြောင်းအရ သတ်မှတ်ချက်များနှင့် ကိုက်ညီနေသောကြောင့် ယခုကဲ့သို့ စာရင်းသွင်းရခြင်းဖြစ်ကြောင်း သိရသည်။
Ref: SCMP
About the Author
