၁၀.၇.၂၀၂၄.
Translated by Htwe Ko Tun

ထိုင်းနိုင်ငံတွင်း တရားမဝင် ရွှေ့ပြောင်းဝင်ရောက်လာသူ မြန်မာနိုင်ငံသား ၁၆ ဦးအား ထိုင်းနိုင်ငံသား လူကုန်ကူးသူ လေးဦးနှင့်အတူ ထိုင်းနိုင်ငံအလယ်ပိုင်း၊ နာခွန်ဆာဝန် ပြည်နယ်အတွင်း ဖာယူဟာ ခီရိ ခရိုင်ရှိ စစ်ဆေးရေးဂိတ်တစ်ခု၌ ဇူလိုင်လ ၁၀ ရက် နံနက်အစောပိုင်းက ဖမ်းဆီးမိခဲ့ကြောင်း ထိုင်းရဲတပ်ဖွဲ့ က ပြောခဲ့သည်။ တရားမဝင်ဝင်ရောက်လာသူများကို ပစ်ကပ်ထရပ်ကားတစ်စီး၌ အပြည့်အကျပ်ထည့်ကာ မူးယစ်စစ်ဆေးရေးဂိတ်ကို ဖြတ်သန်းကြစဉ် ဖမ်းမိခဲ့ခြင်းဟု သိရသည်။

မူးယစ်ဆေးဝါးနှိမ်နင်းရေးရဲတပ်ဖွဲ့များက တာ့ခ်ပြည်နယ်၊ မဲဆောက်ခရိုင်မှ မသင်္ကာဖွယ်ကားနှစ်စီးက ဖာဟုန်ယိုသင် လမ်းမကြီးအတိုင်း ဖာယူဟာ ခီရိ ခရိုင်အတွင်းမောင်းနှင်လာကြောင်း သတင်းရရှိချက်အရ ဘန်ကောက်ကားလိုင်စင်ပြားများတပ်ဆင်ထားသော အနက်ရောင် ပစ်ကပ်ထရပ်ကားတစ်စီးအား နံနက် ၁ နာရီတွင် ဂိတ်၌ ရပ်တန့်စစ်ဆေးခဲ့ခြင်းဖြစ်ကြောင်း မူးယစ်ဆေးဝါးနှိမ်နင်းရေးရဲတပ်ဖွဲ့၏ ရဲမှူးကြီး ပိုင်တွန်း ငမ်လတ်က ပြောခဲ့သည်။

ရဲအရာရှိများက ကားပေါ်တွင် ထိုင်းနိုင်ငံသားသုံးဦးဖြစ်သော အသက် ၄၈ နှစ်ရှိ ယာဉ်မောင်း ဝီနိုင်း ဝါနာ အဝပ်နှင့် အခြားလူငယ်တစ်ဦးကိုတွေ့ရှိခဲ့သည်။ အခြားပစ်ကပ်ကားတစ်စီးကမူ ပထမကား၏နောက် ၁၀ ကီလိုမီတာခန့်အကွာတွင် ဆက်လက်မောင်းနှင်လာခဲ့ခြင်းဖြစ်သည်။

ဒုတိယကားကလည်း ဘန်ကောက်မြို့ ကားလိုင်စင်ပြားများတပ်ဆင်ထားကာစစ်ဆေးရေးဂိတ်သို့ရောက် ရှိအလာတွင် စစ်ဆေးခဲ့ရာ၌ အသက် ၂၇ နှစ်ရှိ ထိုင်းနိုင်ငံသား ပါယွတ် သာအိုခရာဆာဆင် မောင်းနှင်လာခြင်းဖြစ်ကြောင်း တွေ့ခဲ့ရသည်။

ထိုင်းရဲတပ်ဖွဲ့က ဖမ်းဆီးမိခဲ့သော မြန်မာနိုင်ငံသားများတွင် အမျိုးသား ၁၀ ဦးနှင့် အမျိုးသမီး ခြောက်ဦးတို့ပါဝင်ကာ ကား၏နောက်ဘက်အခန်းအတွင်း ၎င်းတို့ကိုတွေ့ရှိခဲ့ခြင်းဖြစ်ကာ အားလုံးကို ဖမ်းဆီးစစ်ဆေးလျက်ရှိကြောင်း သိရသည်။

ယာဉ်မောင်းဝီနိုင်းက အမည်မသိ လူတစ်ဦးက ရွှေ့ပြောင်းနေထိုင်သူများကို မဲဆောက်မှ အယုဒ္ဓယမြို့သို့ ပို့ပေးရန် ၎င်းအား ဘတ်ငွေ ၁၀,၀၀၀ ဖြင့်လာရောက်ငှားရမ်းခဲ့ခြင်းဖြစ်ကြောင်း၊ အယုဒ္ဓယမြို့ရောက်လျှင် တစ်စုံတစ်ဦးက ၎င်းတို့အား လာရောက်ခေါ်ယူကာ ၎င်းတို့၏ အလုပ်နေရာများသို့ ပို့ပေးလိမ့်မည် ဖြစ်ကြောင်း ၎င်းအားပြောခဲ့သည်ဟု ရဲတပ်ဖွဲ့ကမေးမြန်းရာတွင် ဖြေကြားခဲ့သည်။

ထိုင်းရဲတပ်ဖွဲ့က ထိုင်းနိုင်ငံသားလေးဦးအား တရားမဝင် ရွှေ့ပြောင်းဝင်ရောက်လာသူများကို နိုင်ငံအတွင်းခွင့်ပြုချက်မရှိဘဲဝင်ရောက်နိုင်ရန် အထောက်အပံ့ပေးမှုနှင့် ၎င်းတို့ကို ဖမ်းဆီးခံရခြင်းမှ ရှောင်တိမ်းနိုင်ရန် ကူညီမှုတို့ဖြင့်တရားစွဲခဲ့သည်။ မြန်မာနိုင်ငံသား ၁၆ ဦးကိုလည်း ထိုင်းနိုင်ငံအတွင်း တရားမဝင် ဝင်ရောက်မှုဖြင့် ဥပဒေကြောင်းနှင့်အညီဆောင်ရွက်သွားမည်ဟု သိရသည်။

Ref- Bangkok Post

Leave a Reply

Your email address will not be published. Required fields are marked *