သက်တံ့
၂၈. ၆. ၂၀၂၆
ယနေ့ ဇွန်လ ၂၈ ရက် (တနင်္ဂနွေနေ့) ဒေသစံတော်ချိန် နံနက် ၁၁ နာရီဝန်းကျင်တွင် ပြင်သစ်နိုင်ငံအရှေ့ပိုင်း မာ့တ်အဲန်မိုဆဲလ် (Meurthe-et-Moselle) ဒေသ၊ တွန်ဘလိန်း (Tomblaine) မြို့ရှိ လေဆိပ်အနီးတွင် လေထီးခုန်သမားများ တင်ဆောင်လာသည့် အရပ်ဘက်လေယာဉ်တစ်စင်း ပျက်ကျခဲ့ရာ လေယာဉ်ပေါ်ပါ လူ ၁၁ ဦးစလုံး သေဆုံးသွားခဲ့ကြောင်း သိရသည်။
အဆိုပါလေယာဉ်သည် လေထီးခုန်လေ့ကျင့်ရေးခရီးစဉ်အတွင်း လေဆိပ်အစွန်းရှိ အိမ်ရာဝင်းတစ်ခု၏ ဘေးနားသို့ ဒေါင်လိုက်နီးပါး ထိုးဆင်းပျက်ကျခဲ့ခြင်းဖြစ်သည်။
သေဆုံးသူ ၁၁ ဦးတွင် လေယာဉ်မှူး၊ လေထီးခုန်နည်းပြ ၅ ဦးနှင့် အမှီအခိုကင်းသူနာပြုများ (သို့မဟုတ် သင်တန်းသားများ) ၅ ဦး ပါဝင်ကြောင်း သိရသည်။ လေယာဉ်ပျက်ကျချိန်တွင် အနီးအနား၌ သေဆုံးသူများ၏ မိသားစုဝင်အချို့အပါအဝင် မျက်မြင် သက်သေအများအပြား ရှိနေခဲ့သော်လည်း မြေပြင်ရှိ ဖြတ်သန်းသွားလာသူ ပြည်သူများထဲမှ ထိခိုက်သေဆုံးသူ မရှိခဲ့ကြောင်း သိရသည်။
အခင်းဖြစ်ပွားရာနေရာသို့ ရဲတပ်ဖွဲ့ဝင်များနှင့် မီးသတ်သမား ၅၀ ဦး အပါအဝင် အရေးပေါ်ကယ်ဆယ်ရေးအဖွဲ့ အမြောက်အမြားကို ချက်ချင်းစေလွှတ်ဖြန့်ကျက်ခဲ့ပြီး ရဲတပ်ဖွဲ့က လေဆိပ်ပတ်ဝန်းကျင်နယ်မြေသို့ ပြည်သူများ သွားရောက်ခြင်းကို လုံးဝရှောင်ကြဉ်ရန်နှင့် ဝင်ရောက်ခွင့်ကို ကန့်သတ်ခဲ့သည်။
လက်ရှိတွင် ပုံမှန်စုံစမ်းစစ်ဆေးမှုများ ပြုလုပ်ရန် မှုခင်းဆေးပညာအဖွဲ့ ရောက်ရှိလာခြင်းကို စောင့်ဆိုင်းလျက်ရှိသည်။
ဖြစ်စဥ်အပေါ် ဒေသစီရင်စုမင်းကြီး အိဗ် ဆီဂီ (Yves Séguy) က”ကျွန်တော်တို့ဟာ ကယ်ဆယ်ရေးအဖွဲ့တွေ၊ ဒေသခံကိုယ်စားလှယ်တွေအားလုံးနဲ့အတူ တစ်သားတည်း ရှိနေပါတယ်။ သေဆုံးသူတွေနဲ့ သူတို့ရဲ့ မိသားစုဝင်တွေအတွက် များစွာ စိတ်မကောင်းဖြစ်ရပါတယ်” ဟု ပြောကြားခဲ့သည်။
ထို့အတူ သယ်ယူပို့ဆောင်ရေးဝန်ကြီး ဖိလစ် တာဘာရို (Philippe Tabarot) က ယခုဖြစ်ရပ်ကို သေဆုံးသူ အထူးများပြားလှသည့် “ကြောက်မက်ဖွယ် ကပ်ဘေးတစ်ခု” အဖြစ် ပြောဆိုခဲ့ပြီး အခင်းဖြစ်ပွားရာဒေသသို့ လာရောက်မည်ဖြစ်ကြောင်း X ပေါ်တွင် အတည်ပြုခဲ့သည့်အပြင် ပြည်ထဲရေးဝန်ကြီး လော်ရင့် နူးညက်ဇ် (Laurent Nunez) သည်လည်း ဖြစ်ပွားရာနေရာသို့ တိုက်ရိုက်ဦးတည်သွားရောက်နေပြီဖြစ်ကြောင်း ထုတ်ပြန်ထားသည်။
ယခုဖြစ်ရပ်သည် လွန်ခဲ့သည့် သီတင်းပတ်အနည်းငယ်က အမေရိကန်နိုင်ငံ၊ မစ်ဇူရီပြည်နယ်အနောက်ပိုင်းတွင် လေထီးခုန်လေယာဉ်တစ်စင်း ပျံတက်ပြီးပြီးချင်း ပျက်ကျကာ လူ ၁၂ ဦး သေဆုံးခဲ့သည့် ဖြစ်စဉ်အပြီးတွင် ထပ်မံပေါ်ပေါက်လာခြင်းဖြစ်ရာ လေထီးခုန်လေယာဉ်များ၏ စည်းမျဉ်းစည်းကမ်း ထိန်းချုပ်မှုဆိုင်ရာ ငြင်းခုံမှုများကို ပိုမိုပြင်းထန်လာစေနိုင်ကြောင်း သတင်းများက သုံးသပ်ထားကြသည်။
Ref: Way 3 & Open
About the Author
