သက်တံ့
၂၄. ၆. ၂၀၂၆
ပြီးခဲ့သည့် တနင်္လာနေ့ မွန်းလွဲပိုင်းက ချွန်ဘူရီပြည်နယ်၊ သီရိရာချာ (Sri Racha) ခရိုင်ရှိ ရွှေဆိုင်တစ်ဆိုင်တွင် ရွှေဆွဲကြိုးအစစ်ကို ရွှေအတုနှင့် လဲလှယ်ခိုးယူရန် ကြိုးပမ်းခဲ့သည်ဟု သံသယရှိရသူ အသက် ၃၄ နှစ်အရွယ် မြန်မာအမျိုးသမီးတစ်ဦးကို ဖမ်းဆီးရမိခဲ့သည်။
ဇွန်လ ၂၂ ရက်နေ့ ညနေ ၄ နာရီခန့်တွင် အဝေးပြေးလမ်းမ ၃၃၁ ဘေး၊ မူး ၆ (Moo 6) ရှိ ပတ်ရွမ် (Pak Ruam) ဈေးအတွင်း ဖွင့်လှစ်ထားသည့် “ဘွန်ချိုင်း ယာဝရတ်” (Boonchai Yaowarat) ရွှေဆိုင်ပိုင်ရှင်က သံသယရှိသူအား လက်ပူးလက်ကျပ် ဖမ်းမိကြောင်း အကြောင်းကြားလာသဖြင့် ဘိုဝင် (Bo Win) ရဲစခန်းမှ ရဲတပ်ဖွဲ့ဝင်များ အခင်းဖြစ်ပွားရာသို့ သွားရောက်ခဲ့ကြသည်။
ရွှေဆိုင်ပိုင်ရှင်၏ ပြောပြချက်အရ မွန်းဆား (Mrs. Mong Ser) ဟု အမည်ဖော်ထုတ်ထားသည့် အဆိုပါမြန်မာအမျိုးသမီးသည် ရွှေထည်ပစ္စည်းများကို လေ့လာကြည့်ရှုချင်ယောင်ဆောင်ကာ ဆိုင်ထဲသို့ ဦးစွာဝင်ရောက်လာခဲ့သည်။ သူမသည် ၁ မတ် (ထိုင်းအလေးချိန် ၁ ဆလုံ – ၁ Salung၊ အကြမ်းဖျင်း ၃.၇၅ ဂရမ်ခန့်ရှိ) ရွှေဆွဲကြိုးတစ်ကုံးကို အတန်ကြာ ကြည့်ရှုစစ်ဆေးပြီးနောက် ဆိုင်ထဲမှ ပြန်လည်ထွက်ခွာသွားခဲ့သည်။ ထို့နောက် မကြာမီမှာပင် ဆိုင်သို့ ပြန်လည်ရောက်ရှိလာပြီး အဆိုပါ ရွှေဆွဲကြိုးကိုပင် ထပ်မံကြည့်ရှုရန် တောင်းဆိုခဲ့သည်။
ရွှေဆွဲကြိုးကို ၂ မိနစ်မှ ၃ မိနစ်ခန့် ကိုင်တွယ်ကြည့်ရှုပြီးနောက် သူမက ပိုက်ဆံကို အပြင်ထွက်၍ ထုတ်ပြီးမှ ပြန်လာဝယ်မည်ဟု ပြောဆိုကာ ရွှေဆွဲကြိုးဟု ထင်ရသော ပစ္စည်းတစ်ခုကို ဆိုင်ပိုင်ရှင်ထံ ပြန်လည်ပေးအပ်ခဲ့သည်။ သို့သော်လည်း မိမိရွှေထည်ပစ္စည်းကို စိတ်စွဲမြဲနေပြီး နိုးကြားလှသော ဆိုင်ပိုင်ရှင်က ပြန်ပေးလိုက်သည့် ပစ္စည်းမှာ အရည်အသွေးနိမ့်သည့် အခြားပစ္စည်းတစ်ခု (ရွှေတု) ဖြစ်နေသည်ကို သတိပြုမိသွားခဲ့သည်။
ရိပ်မိသွားသော ဆိုင်ပိုင်ရှင်က အမျိုးသမီး ဆိုင်ပြင်မထွက်ခင် ပြန်လည်ခေါ်ယူကာ သူမ၏ အခြားလက်တစ်ဖက်ကို စစ်ဆေးခဲ့ရာ ဆိုင်မှ ရွှေဆွဲကြိုးအစစ်ကို သူမ လက်ထဲတွင်ပင် ဆုပ်ကိုင်ထားဆဲဖြစ်ကြောင်း တွေ့ရှိခဲ့ရသည်။ ထို့ကြောင့် ဆိုင်ပိုင်ရှင်က အမျိုးသမီး ထွက်ပြေး၍မရအောင် ဆိုင်တံခါးကို ချက်ချင်းပိတ်လိုက်ပြီး ရဲတပ်ဖွဲ့ထံ ဆက်သွယ်ခဲ့သည်။
ရဲတပ်ဖွဲ့ဝင်များ အခင်းဖြစ်ပွားရာသို့ ရောက်ရှိလာပြီး သံသယရှိသူအား ဖမ်းဆီးထိန်းသိမ်းခဲ့ကာ ခိုးယူရန် ကြိုးပမ်းမှုဖြင့် ဥပဒေအရ ဆက်လက်အရေးယူ ဆောင်ရွက်လျက်ရှိသည်ဟု သိရသည်။
Ref: Pattaya News
About the Author
