၂၅.၅. ၂၀၂၆
Written by KL
မန္တလေးတိုင်းဒေသကြီး၊ စဉ့်ကိုင်မြို့နယ်၊ ပေါ်တော်မူဘုရားအနီး ဒုဋ္ဌဝတီမြစ်၌ ရေဆင်းချိုးရာမှ ရေနစ်ပျောက်ဆုံးနေသော လူငယ်နှစ်ဦးအနက် တစ်ဦးကို မေလ ၂၄ ရက် နံနက် ၁၀ နာရီခန့်က ရုပ်အလောင်းပြန်လည်တွေ့ရှိခဲ့ကြောင်း ကယ်ဆယ်ရေးဆောင်ရွက်ခဲ့သည့်မြန်မာနိုင်ငံ လူမှုကယ်ဆယ်ရေးအဖွဲ့- မန္တလေးတိုင်းဒေသကြီး ကော်မတီထံမှ သိရသည်။
မေလ ၂၃ ရက် မွန်းလွဲပိုင်းက အသက် ၂၂ နှစ်အရွယ် လူငယ်တစ်ဦးနှင့် အသက် ၂၄ နှစ်အရွယ် လူငယ်တစ်ဦးတို့ ဒုဋ္ဌဝတီမြစ်ထဲ ရေဆင်းချိုးရာမှ ရေနစ်ပျောက်ဆုံးခဲ့ခြင်းဖြစ်သည်။
ရေနစ်ပျောက်ဆုံးနေသည့် လူငယ်နှစ်ဦးကို ရေငုပ်ရှာဖွေပေးရန် အကူအညီတောင်းသဖြင့်မြန်မာနိုင်ငံ လူမှုကယ်ဆယ်ရေးအဖွဲ့ – မန္တလေးတိုင်းဒေသကြီး ကော်မတီ မှ ရေငုပ် ရှာဖွေကယ်ဆယ်ရေးအဖွဲ့ဝင်များဖြင့် ရှာဖွေခဲ့ရာ ၃၆ မိနစ်အကြာတွင် ရေအောက်၌ အသက် ၂၂ နှစ်အရွယ် အမျိုးသား၏ ရုပ်အလောင်းကို ပြန်လည်တွေ့ရှိခဲ့ခြင်းဖြစ်ကြောင်း သိရသည်။
ကျန်ရှိနေသော လူငယ်တစ်ဦးကိုလည်း ဆက်လက်ရှာဖွေလျက်ရှိရာ မေလ ၂၄ ရက် ညနေပိုင်းအထိ မတွေ့သေးကြောင်း သိရသည်။
သေဆုံးသူ၏ရုပ်အလောင်းကို စဉ့်ကိုင်ပြည်သူ့ဆေးရုံရှိ ရင်ခွဲရုံသို့ ပို့အပ်ထားကြောင်း သိရသည်။
About the Author
